 |
| Deus Kibamba muwezeshaji katika mdahalo wa Mwenendo na Athari za mabadiliko ya tabia nchi. |
 |
| Deus Kibamba kutoka Jukwaa la katiba akiwasilisha mada juu ya mikakati ya uhifadhi wa mazingira ili kukabiliana na mabadiliko ya tabia nchi nchini. |
 |
| Sehemu ya washiriki wa mdahalo uliofanyika kata ya Mwandoya wilayani Meatu. |
SHUGHULI
mbalimbali za kibinadamu zinazofanyika katika maeneo ya hifadhi za misitu
mikubwa zimetajwa kuwa ndiyo chanzo kikuu cha mabadiliko ya tabia nchi katika maeneo mengi nchini
hali ambayo inaweza kusababisha athari kubwa isipodhibitiwa mapema.
Hali
hiyo imebainishwa katika mdahalo wa kijamii
ulioandaliwa na Muungano wa Azaki za kiraia wilayani Meatu (MENGONET)
uliofanyika katika kata ya Mwandoya wilayani Meatu mkoa wa Simiyu kwa ufadhili
wa Shirika la The Foundation For Civil Society.
Mmoja
wa wawezeshaji katika mdahalo huo, Deus Kibamba kutoka Jukwaa la Katiba jijini
Dar es Salaam alisema mabadiliko ya hali ya hewa yanayosababisha mvua katika
maeneo mengi kutokunyesha kwa mpangilio yanachangiwa kwa kiasi kikubwa na hali
ya mabadiliko ya tabia nchi kulikosababishwa na uharibifu wa mazingira.
Kibamba
alisema kwa kadri shughuli za kibinadamu zinavyoongezeka kwenye maeneo ya
hifadhi za misitu ipo hatari hata mazao yanayolimwa hivi sasa yakashindwa
kusitawi vizuri na kusababisha kupatikana kwa mavuno machache na hivyo nchi
kukumbwa na uhaba mkubwa wa chakula.
Alisema
hali
hiyo kwa kiasi kikubwa inasababishwa na binadamu wenyewe wanaofanya
shughuli za uharibifu wa mazingira pasipo kuzingatia athari
zitakazotokana
kitendo cha kuharibu misitu ovyo katika maeneo yao na kwamba hivi sasa
hata baadhi ya mazao ya asili hayapatikani katika maeneo mengi mfano wa
uyoga wa asili.
Kibamba
alisema hata hivyo baadhi ya mataifa makubwa yaliyoendelea ikiwemo nchi ya
Urusi ndiyo yaliyokithiri katika uharibifu mkubwa wa mazingira kutokana na
maendeleo ya kiviwanda yaliyopo katika nchi zao na kwamba hivi sasa yanataka
kulitumia bara la Afrika kusaidia kunyonya sumu za taka mbalimbali
zinazozalishwa katika mataifa hayo.
“Baadhi
ya mataifa makubwa duniani ndiyo yanayochangia kwa kiasi kikubwa uharibifu wa
mazingira unaosababisha mabadiliko ya tabia nchi yanayotokea katika maeneo
mengi hasa katika bara letu la Afrika, wenzetu wana uwezo wa kutengeneza njia
mbadala za kukabiliana na uharibifu huo tofauti na sisi ambao wengi wetu ni
maskini,”
“Kwa
hali hii ni lazima tuhamasishane wenyewe kwa wenyewe kuhakikisha tunatunza na
kuilinda kwa nguvu zote misitu yetu mikubwa iliyosalia sambamba na upandaji wa
miti mingi katika maeneo yetu ya makazi, tusipochukua tahadhari mapema ipo
hatari ya kupata athari kubwa zinazotokana na mabadiliko ya tabia nchi,”
alieleza.
Alisema
mpaka hivi sasa kasi ya ukataji miti kwa ajili ya shughuli za kibinadamu katika
maeneo mengi nchini imekuwa ikiongezeka na haiendani na kasi ya upandaji wa miti mipya na kwamba kila
mtu anapaswa kuwa mlinzi wa mwenzake ili kuepusha uharibifu wa misitu na
mazingira katika maeneo wanayoishi.
“Hivi
sasa katika maeneo mengi watu wanalalamika kuwepo kwa ongezeko kubwa la joto,
lakini hawajiulizi kwa nini hali hiyo inatokea, ni wazi kuwa kuongezeka kwa
uharibifu wa mazingira ndiyo sababu ya ongezeko la joto, sasa tuhimizane
kupanda miti kwa wingi, mbali ya kutoa kivuli lakini pia miti hunyonya hewa
chafu,” alieleza Kibamba.
Post a Comment