 |
| Kamanda wa TAKUKURU mkoani Shinyanga, Gasto Mkono akizungumza na waandishi wa habari ofisini kwake. |
TAASISI ya Kuzuia na Kupambana na Rushwa
(TAKUKURU) mkoani Shinyanga imewakamata na kuwafikisha mahakamani watumishi
watatu wa Hospitali binafsi inayomilikiwa na Kanisa la AIC Shinyanga
wakituhumiwa kwa kosa la kuisababishia hasara serikali kiasi cha shilingi
milioni 63.4.
Watumishi waliofikishwa mahakamani ni pamoja na aliyekuwa mganga mkuu wa hospitali hiyo, Dkt. Elimeleki Katani, wakuu wa idara ya uhasibu, Hamisi Batano na Samson Maselle.
Watumishi hao wote kwa pamoja mbali ya
mashitaka ya kuisababishia hasara serikali pia wanashitakiwa kwa makosa ya
matumizi mabaya ya madaraka yao ikiwemo matumizi mabaya ya fedha ya ruzuku
inayotolewa na serikali.
Kwa
mujibu wa taarifa iliyotolewa kwa waandishi
wa habari na OfisaUhusiano na habari wa TAKUKURU makao makuu Mussa
Misalaba,
watumishi hao wanashitakiwa kwa makosa manne ikiwemo kulipa mishahara
hewa na kuwasilisha michango hewa NSSF kwa mstaafu aliyetajwa kwa jina
la Dkt. Emmanuel
Mwandu.
 |
| Waandishi wa habari wakipokea taarifa ya utendaji kazi za TAKUKURU Shinyanga kati ya Julai, 2016 na Machi, 2017. |
 |
| Baadhi ya waandishi wa habari mjini Shinyanga wakitoka katika ofisi za TAKUKURU Shinyanga. |
Misalaba alisema katika shitaka la kwanza
washitakiwa hao wanadaiwa kati ya Juni 10, 2011 na Januari 1, 2016 walitumia
madaraka yao vibaya kwa kushindwa kurejesha kwa mlipaji mkuu wa serikali
mshahara wa mstaafu, Dkt. Emmanuel Mwandu kiasi cha shilingi 63,479,800.
Shitaka la pili inadaiwa washitakiwa hao kati
ya Septemba 18, 2013 na Agosti 21, 2014 waliandaa na kupeleka katika Shirika la
Hifadhi ya Jamii (NSSF) kiasi cha shilingi 14,361,124 ikiwa ni michango ya
mstaafu, Dkt. Emmanuel Mwandu.
Shitaka la tatu linamuhusu mshitakiwa Batano
anayedaiwa kati ya Mei 30, 2011 na Januari 6, 2014 alitumia madaraka yake
vibaya na kuandaa orodha ya malipo kama mshahara wa mstaafu Dkt. Emmanuel
Mwandu kiasi cha shilingi 14,361,124 huku shitaka la nne la kuisababishia hasara
serikali kiasi cha shilingi 63,479,800 likiwahusu washitakiwa wote.
Tayari washitakiwa wote wamesomewa mashitaka
yao na mwendesha mashitaka wa TAKUKURU, Carson Nkya mbele ya Hakimu mkazi
mfawidhi, Rahimu Mushi na wamekana mashitaka yote ambapo kesi hiyo imeahirishwa
mpaka Mei 3, mwaka huu itakapotajwa tena mahakamani hapo. Washitakiwa wote wako nje kwa dhamana baada
ya kutimiza masharti ya dhamana.
Wakati huo huo ofisi ya TAKUKURU mkoani
Shinyanga imepokea jumla ya taarifa 36 za matukio ya rushwa yaliyoripotiwa
ndani ya kipindi cha miezi tisa iliyopita (Julai 2016 hadi Machi 31, 2017)
zikihusisha idara ya mahakama, polisi, ardhi, afya, elimu, taasisi binafsi,
madini, biashara, michezo na siasa.
Akitoa
taarifa ya utendaji kazi ya taasisi yake,
Kamanda wa TAKUKURU mkoani Shinyanga, Gasto Mkono alisema tayari
wanaendelea na uchunguzi wa kina juu ya taarifa zilizopokelewa kwa
kufungua
majalada ya uchunguzi kwa ajili ya kuchunguza taarifa zote
zilizopokelewa.
Mbali
ya kupokea taarifa za matukio ya rushwa
pia TAKUKURU mkoani humo katika kipindi hicho cha miezi tisa imefanikiwa
kuokoa
kiasi cha shilingi 114,479,838.28 kutoka idara za Afya, Elimu na kilimo
zilizokuwa zitumike kinyume cha utaratibu ikiwemo ulipaji mishahara
hewa.
“Katika kipindi cha miezi tisa iliyopita
tumepokea taarifa 36 zinazohusiana na masuala ya rushwa na tayari tumefungua
majalada 23 ya uchunguzi kuhusiana na taarifa hizo, taarifa hizi zinahusu upande
wa idara za elimu, michezo, biashara na siasa, na tayari kesi tatu zimefikishwa mahakamani,”
“Lakini pia zipo kesi tisa zinazoendelea
mahakamani zikihusisha idara za fedha katika halmashauri, afya, elimu na Jeshi
la Polisi ambapo katika kipindi hiki tumeshinda kesi tatu huku tukishindwa kesi
nne na kesi tisa bado zinaendelea kusikilizwa,” alieleza Mkono.
Aliendelea
kueleza ofisi yake inaendelea
na utafiti na udhibiti ya mianya ya rushwa katika idara mbalimbali za
serikali
na taasisi binafsi ikiwemo pia kufuatilia utekelezaji wa miradi
mbalimbali ya
maendeleo katika halmashauri za manispaa na wilaya ili kubaini iwapo
inatekelezwa kwa kiwango kinacholingana na fedha zilizotolewa.
 |
| Ofisi za TAKUKURU Shinyanga. |
Aidha Kamanda huyo wa TAKUKURU aliwapongeza wakazi wa mkoa wa
Shinyanga ikiwemo vyombo vya habari kwa msaada mkubwa wanaoutoa na kuweza
kufanikisha kukabiliana na matukio ya rushwa katika idara mbalimbali za umma na hivyo
kudhibiti upotevu wa fedha za serikali kwa njia ya ulipaji mishahara hewa.
“Tunawashukuru wakazi wa mkoa wa Shinyanga ikiwemo
wana habari kwa msaada mkubwa wanaotupatia katika mapambano haya dhidi ya
vitendo vya rushwa katika mkoa wetu, na tunawaomba wasichoke waendelee
kutupatia taarifa mbalimbali zitakazosaidia kuwakamata na kuwafikisha
mahakamani watuhumiwa wote,” alieleza Mkono.
Post a Comment