 |
| Ofisa Mthamini katika Halmashauri ya wilaya ya Kishapu, Reuben Lauwo akijibu hoja mbalimbali zilizotolewa na Kituo cha Taarifa na Maarifa (Mtandao wa Nyuki) kutoka kata ya Mwadui-Lohumbo |
 |
| Wawakilishi wa kituo cha Taarifa na Maarifa kata ya Mwadui-Lohumbo wakisoma risala yao mbele ya mgeni rasmi. |
 |
| Kaimu mkurugenzi mtendaji wa Halmashauri ya wilaya ya Kishapu, George Kessy akifungua kikao. |
MMOJA wa wataalamu katika halmashauri ya wilaya ya Kishapu mkoani Shinyanga amejikuta akipandwa na jazba na kususia kikao kilichokuwa kinajadili changamoto zinazowakabili wakazi wa kata ya Mwadui-Lohumbo wilayani humo.
Hali
hiyo ilijitokeza katika kikao maalumu kilichofanyika mjini Mhunze wilayani
Kishapu kilichoandaliwa na Mtandao wa Jinsia nchini – TGNP ambapo kituo cha
Taarifa na Maarifa (mtandao wa nyuki) kutoka kata ya Mwadui-Lohumbo kiliwasilisha
changamoto mbalimbali zinazowakabili wakazi wa kata hiyo.
Uamuzi
wa mtaalamu huyo, Reuben Lauwo ambaye ni Ofisa mthamini wa wilaya ulitokana na wajumbe
wa kikao hicho kumshinikiza ataje kiwango halisi cha fedha ambazo mwekezaji
kampuni ya El-Hilal Mining anatakiwa kuwalipa kwa kila ekari moja wakulima wa kata ya Mwadui-Lohumbo
waliochukuliwa mashamba yao.
“Mheshimiwa
mwenyekiti ni kweli paliundwa tume maalumu kushughulikia mgogoro huu ambao ni
wa muda mrefu, na kwenye kikao kilichowakutanisha baadhi ya wananchi, mwekezaji
na watendaji wa serikali kuna kiwango mwekezaji alikubali kulipa, lakini
kitaalamu mimi sipaswi kukitaja hapa,”
“Naheshimu maadili na misingi ya kazi yangu, hivyo siwezi kugeuka na kutaja
kiwango hicho hali inayoweza kunisababishia matatizo hapo baadae,
tusiligeuze jambo hili kuwa la kisiasa, tuheshimu sheria na taratibu za nchi zilizopo,
siwezi kusema kiwango kilichotamkwa hata kama mtanilazimisha,” alieleza Lauwo.
 |
| Diwani wa kata ya Songwa, Abul Mohamed (kulia) akifuatilia kwa makini hoja zinazowasilishwa na kituo cha Taarifa na Maarifa (Mtandao wa Nyuki) kata ya Mwadui-Lohumbo wilayani Kishapu, kushoto ni Ofisa mipango wa Halmashauri ya wilaya ya Kishapu. |
 |
| Wajumbe wa kamati ndogo ndogo wakiwasilisha changamoto zinazowakabili katika kata ya Mwadui-Lohumbo |
Awali wakiwasilisha changamoto mbalimbali zinazowakabili wakazi wa kata ya Mwadui – Lohumbo wajumbe wa kituo cha Taarifa na Maarifa katika sekta ya madini walisema pamoja na mwekezaji kampuni ya El-Hilal kuahidi kuwalipa fidia baada ya mashamba yao kuchukuliwa lakini ameshindwa kutekeleza ahadi hiyo mpaka hivi sasa.
Walisema
mbali ya El-Hilal Mining pia lipo tatizo kwa mwekezaji mwingine kampuni ya Williamson Diamonds
Ltd iliyopo Mwadui ambaye ameshindwa kujenga mahusiano mazuri kati yake na wanajamii
wanaoishi katika vijiji vinane vinavyouzunguka mgodi huo wa almasi.
“Mheshimiwa
mgeni rasmi, moja ya mambo ambayo mwekezaji kampuni ya Williamson Diamond Ltd.
ameshindwa kutekeleza ni suala la utoaji ajira kwa vijana wetu,
badala yake anaajiri vijana kutoka nje ya vijiji vyetu, hali hii ndiyo inayochangia
baadhi kuvamia mgodini kuiba mchanga wenye madini ya almasi ili wapate fedha za kujikimu,”
“Tunachoomba
ajenge mahusiano mazuri na wanajamii wanaoishi katika vijiji vinane
vinavyouzunguka mgodi, tunaamini akiwa na mahusiano mazuri na kuwapatia ajira
vijana wetu suala la mgodi kuvamiwa na watu wanaojiita “wabeshi” litamalizika,
maana hata sisi tutakuwa walinzi awa mgodi,” alieleza Sarah Masinga mwenyekiti wa kituo.
Kwa
upande wake kaimu mkurugenzi wa maendeleo katika halmashauri ya wilaya ya
Kishapu, Reuben Kessy alisema alisema lengo la serikali kukaribisha wawekezaji
ni kutaka kuinua uchumi wa taifa pamoja na wananchi wake kwa ujumla ambao husaidiwa miradi mbalimbali ya kijamii.
“Kuna
changamoto nyingi katika maeneo ya migodi hapa nchini, lakini niwaombe wananchi
wajitahidi kujenga mahusiano mazuri na wawekezaji waliopo, kwa hili la
Mwadui-Lohumbo nashauri zifanyike taratibu za kukaa pamoja kati ya pande mbili
na kuweka mambo sawa, ikishindika basi halmashauri tushirikishwe,” alieleza Kessy.
Post a Comment