 |
| Meneja Tawi la CRDB Shinyanga, Said Pamui akitoa taarifa kwa mgeni rasmi juu ya mpango wa kuwakopesha pikipiki kwa masharti nafuu vijana wanaofanya biashara ya kusafirisha abiria kwa kutumia pikipiki (bodaboda) kulia ni mkuu wa wilaya ya Shinyanga, Josephine Matiro. |
BENKI ya CRDB Tawi la
Shinyanga imezindua mpango maalumu wa utoaji mikopo yenye masharti nafuu kwa
vijana waendesha pikipiki za kusafirisha abiria (bodaboda) manispaa ya
Shinyanga ili kuwasaidia waweze kujiajiri wenyewe.
Mpango huo unatarajiwa
kuwakomboa vijana wengi wanaofanya biashara hiyo hivi sasa kwa kutegemea
pikipiki za kukodi kutoka kwa watu wengine na kulazimika kuwapelekea wamiliki
sehemu kubwa ya mapato wanayopata kwa siku.
Akitoa taarifa juu ya
uanzishwaji wa mpango huo wakati wa hafla fupi ya kuwakabidhi vijana wanne wa
awali waliokopeshwa mkopo wa pikipiki aina ya SANLG, meneja wa Tawi la
CRDB Shinyanga, Saidi Pamui alisema ni matumaini ya benki yake mikopo hiyo
itakuwa ni mkombozi kwa vijana wanaofanya biashara ya bodaboda.
“Tulipokea maombi
kutoka kwa viongozi wa kikundi cha Umoja wa wamiliki na madereva wa pikipiki za
kukodisha manispaa ya Shinyanga (SHIMODU) wakitaka tuwasaidie kuwapatia fedha
kwa ajili ya kununulia pikipiki zao wenyewe badala ya kufanya kazi kwa kutumia
za kukodi kutoka kwa watu wengine,”
“Katika maombi yao
walisema wamekuwa wakifanya biashara hiyo lakini hawaoni faida wanayoipata
kutokana na kulazimika kuwakabidhi wamiliki wa pikipiki wanazokodi sehemu kubwa
ya kipato wanachokipata kwa siku, tulikaa na tukatafakari, tukaona tuanzishe
utaratibu wa kuwakopesha kwa masharti nafuu,” alieleza Pamui.
 |
| Meneja Pamui akitoa hotuba yake mbele ya mgeni rasmi, mkuu wa wilaya ya Shinyanga, Josephine Matiro wa kwanza kulia ni mwenyekiti wa Umoja wa wamiliki na madereva wa pikipiki za kukodisha manispaa ya Shinyanga (SHIMODU, Mwito Mniko na Mkuu wa Chuo cha VETA Shinyanga, Alfred Nkomoi. |
“Leo (juzi) tunakabidhi
pikipiki nne ambazo ni mkopo wenye thamani ya shilingi milioni tisa, zimelipiwa
kila kitu ikiwemo bima ya ajali na bima ya maisha, hivyo kijana akitoka nayo
hapa anaingia kazini moja kwa moja,"
"Riba ya mkopo huu
wa pikipiki ni asilimia 18 kwa miezi 12, yaani mwaka mmoja na marejesho
ya mwezi ni shilingi 177,000, tunaamini wote watazingatia masharti ya mkopo
huu, na wataurejesha kwa wakati, kwa vile mapato ya siku waliyopaswa kupeleka
kwa mmiliki sasa yatakuwa ni marejesho ya mkopo,” alieleza Pamui.
 |
| Mwenyekiti wa SHIMODU, Mwita Mniko akitoa hotuba ya shukrani kwa uongozi wa CRDB kwa kukubali kutoa mikopo ya pikipiki yenye masharti nafuu kwa wanachama wake. |
Awali katika taarifa
yake mwenyekiti wa SHIMODU, Mwita Mniko aliushukuru uongozi wa CRDB Tawi la
Shinyanga kwa kukubali ombi lao na kwamba hatua hiyo itawasaidia vijana wengi
walioko katika biashara ya bodaboda kujikomboa kutoka katika utumwa wa
kuwatumikia watu wengine.
Hata hivyo aliomba
serikali na wadau mbalimbali wa maendeleo mjini Shinyanga kuangalia uwezekano
wa kuwasaidia ili waweze kupata fedha za kutosha zitakazotumika kama dhamana ya
mkopo kwa kundi la vijana wengine zaidi ya 65 ambao ni wanachama wa SHIMODU
wanaohitaji pia kupatiwa mkopo wa pikipiki.
“Mheshimiwa mgeni
rasmi, mkuu wetu wa wilaya, Josephine Matiro, kwa niaba ya wanachama wa SHIMODU
naomba niwashukuru wenzetu wa CRDB kwa kutushika mkono sisi vijana waendesha
pikipiki, ukweli ni kwamba mkopo huu ni mkombozi kwetu, hata hivyo wahitaji
bado ni wengi, na chama hakina fedha za dhamana ya mkopo,”
“Moja ya masharti ya
mkopo huu ni chama kuweka dhamana ya shilingi 200,000 kwa kila mkopaji, chama
chetu bado ni kidogo, wahitaji ni wengi, hivyo kwa hawa wanne wa leo tayari
tumeweka dhamana ya shilingi 800,000 kwa hali hii tunaomba serikali au wadau
wengine watuchangie ili kutunisha mfuko wetu,” alieleza Mniko.
 |
| Mkuu wa wilaya ya Shinyanga akikabidhi rasmi pikipiki nne aina ya SNGL kwa vijana wa kwanza kutoka kikundi cha SHIMODU waliokopeshwa pikipiki kwa masharti nafuu. |
Mkuu wa wilaya ya Shinyanga Josephine Matiro mbali ya
kuipongeza benki ya CRDB kwa kuanzisha mpango huo alisema hatua ya mpango huo mbali
ya kuwaondoa katika dimbwi la utumwa kutokana na kukodi pikipiki za watu
wengine lakini pia unaenda sambamba na utekelezaji wa Ilani ya uchaguzi ya
Chama cha Mapinduzi (CCM).
“Tunawapongeza wenzetu wa CRDB kwa kubuni utaratibu
huu mzuri, hawa ni wadau wakubwa wa maendeleo hapa nchini, mpango waliouanzisha
utawapunguzia vijana wetu adha ya kukopa mitaani kwa riba kubwa au kutumikishwa
na watu wengine kwa kipato kidogo,”
“Ni matumaini yangu kuwa vijana mtaitumia vizuri fursa
hii kwa kukopa na kulipa madeni yenu kwa wakati kama mlivyokubaliana, lakini
pia niwaombe mzingatie sheria za usalama barabarani katika kufanya kazi zenu za
kila siku, pamoja na kulipa kodi mbalimbali za serikali, na msibebe abiria
zaidi ya wale wanaohurusiwa kisheria,” alieleza Matiro.
Kwa upande mwingine mkuu huyo wa wilaya alisisitiza
umuhimu wa vijana kujiunga kwenye vikundi kama walivyojiunga vijana hao wa
bodaboda ambao wameanzisha kikundi chao cha Umoja wa wamiliki na madereva wa
pikipiki za kukodisha (SHIMODU) ili iwe rahisi kwao kusaidiwa na serikali ama
taasisi nyingine za kifedha.
Post a Comment