CHADEMA YATEMA CHECHE MKOANI SHINYANGA, YAKEMEA MATUMIZI MABAYA YA MADARAKA.

Mwenyekiti wa Umoja wa Vijana wa CHADEMA (BAVICHA), Paschal Katambi akionesha kadi ya CCM aliyopewa na mwana CCM aliyekutana naye njiani ambapo alisema, misingi ya CCM enzi za Hayati Baba wa Taifa, Mwalimu Julius Kambarage Nyerere.

Maelfu ya wakazi wa mji wa Shinyanga na vitongoji vyake waliojitokeza katika mkutano wa hadhara ulioitishwa na CHADEMA kuwashukuru wananchi hao kwa hatua yao ya kuwachagua wagombea wengi wa CHADEMA katika uchaguzi wa serikali za mitaa uliofanyika Desemba 14, 2014.

CHAMA Cha Demokrasia na Maendeleo (CHADEMA) kimewataka viongozi wa serikali ya CCM kuacha kutumia vibaya madaraka waliyonayo huku wakiwagawa watanzania kwa misingi ya kimatabaka mambo yaliyopigwa vita na hayati baba wa Taifa, Mwalimu Julius Kambarage Nyerere. Akihutubia maelfu ya wakazi wa mji wa Shinyanga na vitongoji vyake katika mkutano wa hadhara uliofanyika kwenye viwanja vya mahakama ya mwanzo mjini humo, mwenyekiti wa Taifa wa Umoja wa vijana wa CHADEMA (BAVICHA), Paschal Katambi alisema serikali ya CCM imeanza dalili za kuonesha kutoheshimu haki na misingi ya kibinadamu.

Katambi alisema wapo viongozi wengi ndani ya serikali wamekuwa wakitumia vibaya madaraka yao kwa misingi ya kukiwezesha Chama cha Mapinduzi kiendelee kutawala daima katika nchi hii ambapo kwa wale wanaoonesha kutokiunga mkono chama hicho wamekuwa wakipata matatizo ikiwemo kukamatwa na polisi wengine kukumbwa na vifo vya mashaka.

Alisema katika maeneo mengi hivi sasa wananchi wanaolalamika kutotendewa haki na watendaji wa serikali wakinyimwa haki zao za msingi na kutendewa vitendo vinavyopingana na haki za kibinadamu hali ambayo imechangia malalamiko mengi mfano wa migogoro ya ardhi iliyoshamiri sehemu nyingi nchini.

Mbali ya migogoro ya ardhi ambapo wananchi kila kunapokucha wanafukuzwa kutoka katika maeneo yao ili kuwapisha wawekezaji wa kigeni lakini pia lipo tatizo la viongozi wa CCM kulitumia vibaya Jeshi la Polisi ili kulinda maslahi ya chama chao kwa lengo kukiwezesha kiendelee kutawala daima japokuwa wananchi wamekichoka.