WAFUGAJI WAISHAURI SERIKALI

IGUNGA

SERIKALI imeshauriwa kuanza mikakati ya kutenga maeneo maalumu kwa ajili ya wafugaji nchini ili kumaliza kabisa migogoro ya mara kwa mara inayojitokeza kati ya wafugaji na wakulima ambayo tayari imeanza kusababisha mauaji katika maeneo mengi.

Meneja wa utawala bora na haki za binadamu katika shirika la PINGOs Forum, Emmanuel Saringe akiangalia baadhi ya ng'ombe wa wafungaji katika kijiji cha Isakamaliwa wilayani Igunga mkoani Tabora baada ya kuwatembelea wafugaji baada ya tukio la mapigano kati yao na wakulima wa kijiji hicho yaliyotokea hivi karibuni na kusababisha vifo vya watu watano.

Imeelezwa kuwa migogoro hiyo inaweza kuendelea kujitokeza kila mara na kusababisha vifo kwa wananchi wasio na hatia iwapo serikali haitaweka kipaumbele katika kuainisha maeneo kwa ajili ya wafugaji na wakulima ili makundi hayo mawili yaache kuhasimiana kwa kugombea maeneo.

Ushauri huo umetolewa hivi karibuni na meneja wa utawala bora na haki za binadamu kutoka Shirika la Wafugaji nchini (PINGOs Forum), Emmanuel Saringe alipokuwa akizungumza kwa nyakati tofauti na wafugaji na wakulima katika wilaya za Igunga mkoani Tabora, Kishapu Shinyanga, Bariadi na Meatu mkoani Simiyu.

Saringe alisema migogoro kati ya wakulima na wafugaji inayoendelea hivi sasa katika maeneo mengi nchini huku ikiwa imesababisha kupotea kwa maisha ya watanzania wasio na hatia inachangia kwa kiasi kikubwa na kutokuwepo maeneo yaliyotengwa maalumu kwa ajili ya wafugaji.

Alisema utatuzi wa migogoro hiyo ni serikali kutenga maeneo kwa ajili ya wafugaji ili yaweze kufahamika rasmi kama ilivyofanyika kwa wanyamapori ambapo hifadhi kwa ajili ya wanyama hao zimetengwa na kuwekea mipaka inayotambulika kisheria na kwamba inaweza kufanyika pia kwa wafugaji.

“Pamoja na serikali kila mara kutangaza dhamira yake ya kumsaidia mfugaji hapa nchini ili aweze kufuga kisasa lakini hakuna utekelezaji wowote unaofanyika kuhusiana na kauli hiyo, mara kwa mara wafugaji wanashauriwa kupunguza idadi ya mifugo yao ni ushauri mzuri, swali linabaki palepale kwa hii michache wanayosalia nayo waifugie wapi?”

Kwa upande mwingine meneja huyo ameishauri pia serikali kuainisha vizuri mipaka iliyopo kati ya hifadhi za wanyamapori na maeneo ya serikali za vijiji ili kupunguza malalamiko ya wanavijiji ambavyo vimepakana na hifadhi hizo kubughudhiwa kila mara na askari wanyamapori huku mifugo yao ikikamatwa kila mara na kutozwa faini kubwa.

Nao wanavijiji vya Mbushi, Bukundi na Jinamo wilayani Meatu, Ihushi na Nkindwabiye wilayani Bariadi mkoa wa Simiyu, Magalata wilayani Kishapu mkoa wa Shinyanga wameiomba serikali kuangalia upya suala la mipaka katika maeneo yao ili kumaliza migogoro iliyodumu kwa muda mrefu na kusabababisha kutokea mapigano.

Katika kijiji cha Ihushi uongozi wa serikali ya kijiji ulilalamikia kitendo cha serikali kuendelea kumega kinyemela eneo la ardhi katika chao na kuongeza upana wa eneo la hifadhi ya Maswa Game reserve bila ya wao wenyewe kushirikishwa hali ambayo imewashangaza na kuomba mipaka hiyo ipimwe upya.

Akizungumzia hali hiyo mkuu wa wilaya ya Bariadi, Erasto Sima alisema ofisi yake haina taarifa zozote za kusudio la kutaka kuongezwa kwa eneo la Maswa Game reserve kwa vile idara ya wanyamapori Taifa imekuwa haiwashirikishi viongozi wa kiserikali kila pale wanapotekeleza majukumu yao.

“Sina taarifa kama kuna mpango wa kuongezwa kwa eneo la hifadhi ya pori la akiba la Maswa, maana hawa wenzetu mambo mengi wanayafanya bila ya kutushirikisha, ni mpaka pale wanapopata tatizo ndipo hukumbuka uwepo wa ofisi serikali katika eneo husika,”

“Ni vizuri tukakaa pamoja na kuangalia jinsi gani tunawasaidia wafugaji wetu, sheria za hifadhi ya wanyamapori zinafahamika, lakini pia wapo wafugaji wenye tabia ya kuingiza mifugo yao kwa nguvu ndani ya hifadhi, yote haya yanaweza kupatia ufumbuzi kwa kukaa pamoja kati ya pande zote husika,” alisema Sima.

end.

Asante kwa kutembelea mtandao huu