TANI 6.1 ZA PEMBE ZA NDOVU ZATEKETEZWA - MAJANGILI MATE YAWADONDOKA!!!!

PEMBE ZA NDOVU ZENYE UZITO WA TANI 6.1 ZIKITEKETEZWA!

Kwa mara ya kwanza Ethiopia imeteketeza tani 6.1 za pembe za ndovu na bidhaa zake kwenye hafla iliyoandaliwa Ijumaa katika bustani ya Gulele katika mji mkuu Addis Ababa.

Pembe hizo pamoja na bidhaa zingine za pembe za ndovu zilikamatwa zaidi ya miaka 30 iliyopita katika maeneo mbalimbali nchini humo na pia zikisafirishwa kwenye uwanja wa kimataifa wa ndege wa Bole.

Naibu waziri mkuu wa Ethiopia Demeke Mekonnen amesema kuteketezwa kwa pembe hizo ni hatua ya nchi yake ya kuhifadhi na kulinda raslimali zake asili pamoja na wanyama pori kwa ajili ya maendeleo endelevu.

Demeke amesisitiza haja ya kuimarisha ushirikiano wa kikanda na kimataifa kukabiliana na tatizo la ujangili na biashara haramu ya wanyamapori.

Mkurugenzi wa Shirika la Mpango wa Maendeleo la Umoja wa Mataifa UNDP nchini humo bwana Samuel Bwalya amesema uharibifu huo wa pembe za ndovu inaonyesha dhamira ya Ethiopia ya kulinda rasilimali za wanyamapori na kupambana na biashara haramu ya wanyamapori.

Source: China Swahili Radio.